Matthew 6

1Ku yi hankali kada ku yi ayyukan adalcinku gaban mutane domin su ganku, idan kun yi haka, ba za ku sami sakamako a wurin Ubanku da yake sama ba. 2Saboda haka, in za ku yi sadaka, kada ku busa kaho yadda munafukai suke yi a majami’u da kuma akan tituna domin mutane su yabesu. Gaskiya ina gaya maku, sun samu ladansu.

3Amma in za ku yi sadaka, kada hannunku na hagu ya san abin da hannunku na dama yake yi, 4domin sadakarku ta zama a asirce. Ubanku kuwa da yake ganin abin da ake yi a asirce, zai saka maku.

5Sa’adda za ku yi addu’a kuma, kada ku zama kamar munafukai, domin sun cika son yin addu’a a tsaye a majami’unsu da kuma a gefen tituna, domin mutane su gansu. Gaskiya ina gaya maku, sun sami ladarsu kenan. 6Amma ku, idan za ku yi addu’a, sai ku shiga cikin daki. Ku rufe kofa, ku yi addu’a ga Ubanku wanda yake a asirce, Ubanku kuwa da ke ganin abin da ake yi a asirce, zai saka maku. 7Idan za ku yi addu’a, kada ku yi ta maimaici marar anfani, kamar yadda al’ummai suke yi, domin a tunanin su za a saurare su saboda yawan maganganunsu.

8Domin haka, kada ku zama kamarsu, domin Ubanku ya san bukatar ku tun kafin ku roke shi. 9Saboda haka sai ku yi addu’a kamar haka: ‘Ubanmu da ke sama, bari a tsarkake sunanka. 10Bari mulkinka shi zo. Bari nufinka ya yiwu a duniya kamar yadda ake yi a sama.

11Ka ba mu yau abincinmu na kullum. 12Ka gafarta mana basussukanmu, kamar yadda mu ma muke gafarta ma wadanda muke bi bashi. 13Kuma kada ka kawo mu cikin jaraba, amma ka kubutar da mu daga Mugun.’ [Gama mulki da iko da daukaka naka ne har abada. Amin]

14Domin in kun yafe wa mutane laifuffukansu, Ubanku na Sama shima zai yafe maku. 15In kuwa ba ku yafe wa mutane laifuffukansu ba, Ubanku ma ba zai yafe muku laifuffukanku ba.”

16Haka kuma, in za ku yi azumi, kada ku zama da fuska kamar masu makoki yadda munafukai ke yi, domin sukan yankwane fuskokinsu, domin su bayyana ga mutane kamar suna azumi. Gaskiya, ina gaya maku, sun sami ladansu ke nan. 17Amma in kuna azumi, ku shafa mai a ka, ku kuma wanke fuska, 18don kada mutane su gane kuna azumi, sai dai Ubanku da yake a asirce. Kuma Ubanku da ke ganin abinda ke a asirce, zai saka maku.”

19“Kada ku tara wa kanku dukiya a duniya, inda asu da tsatsa ke batawa, inda barayi kuma ke fasawa su yi sata. 20Maimakon haka, ku tara wa kanku dukiya a sama, inda babu asu da tsatsa da za su bata, inda kuma ba barayi da za su fasa su yi sata. 21Domin inda dukiyar ka take, a nan zuciyar ka ma take.

22Ido shi ne fitilar jiki. Saboda haka, idan idonka na da kyau, dukan jiki na cike da haske. 23Amma in idonka na da lahani, dukan jiki na cike da duhu. Saboda haka, in hasken da yake cikinka duhu ne, ina misalin yawan duhun! 24Ba mai iya bauta wa iyayengiji biyu, ko dai ya ki daya, ya so daya, ko kuma ya amince wa dayan ya raina dayan. Ba dama ku bauta wa Allah da kuma dukiya.

25Saboda haka ina gaya maku, kada ku damu a kan rayuwarku, game da abin da za ku ci, da abin da za ku sha- ko kuwa jikinku, abin da za ku yi tufafi da shi. Ashe rai bai fi abinci ba, jiki kuma bai fi tufafi ba? 26Ku dubi tsuntsayen da ke sararin sama. Ai, ba su shuka, balle girbi, ba su kuma tarawa a cikin rumbuna, amma Ubanku na Sama na ciyar da su. Ashe, ba ku fi su martaba ba?

27Kuma wanene a cikinku, don damuwarsa, zai iya kara ko taki ga tsawon rayuwarsa? 28To, don me kuke damuwa a kan tufafi? Ku dubi furannin jeji, yadda suke girma. Ba su aiki, kuma ba su sakar kaya. 29Duk da haka ina gaya maku, ko Sulaimanu ma, cikin dukan daukakar sa bai yi ado kamar daya daga cikin wadannan ba.

30Idan Allah yayi wa ciyawar jeji ado, wadda yau tana wanzuwa, gobe kuwa a jefa ta cikin murhu, ina misalin adon da za ya yi maku, ya ku masu karancin bangaskiya? 31Don haka kada ku damu, kuna cewa, ‘Me za mu ci? ko, Me za mu sha?’ ko kuwa, ‘Wadanne tufafi za mu sa?’

32Ai, al’ummai ma suna neman dukan irin wadannan abubuwa, Ubanku na sama kuwa ya san kuna bukatarsu. 33Amma ku nemi mulkinsa da farko da adalcinsa, kuma dukan wadannan abubuwa za a baku. “Saboda haka kada ku damu don gobe, ai, gobe za ta damu da kanta. Kowace rana ta na cike da wahalarta”.

34